María Alonso Seisdedos

María Alonso Seisdedos naceu contra a súa vontade nunha cidade do sur de Galicia en 1961 e fíxose autónoma para ter aldea de seu, por iso levantou chamborra en Goián en 1988.
O vicio polos idiomas e unha casualidade como outra calquera levouna en 1985 a traballar de tradutora no eido da dobraxe e o subtitulado de audiovisuais. En 2009, tamén por azar, estreouse na tradución literaria da man da Editorial Galaxia con O museo da inocencia, de Orhan Pamuk, en colaboración con Bartuk Aykan, que foi recoñecida co premio da AELG á Mellor Tradución dese ano. Recibiu, ademais, o Premio Nacional de Tradución 2014, compartido con Eva Almazán, Antón Vialle e Xavier Queipo, pola versión galega de Ulises de James Joyce; o I Xela Arias, en 2018; os Follas Novas de 2021, 2022 e 2023; o X Plácido Castro, en 2022; e o Ramon Llull en 2022. En 2024 publicou a súa primeira novela, As Jermaine, na editorial Galaxia.
Desde 2018 dedica as horas laborais en exclusiva á tradución editorial e, as de lecer, a ler, a camiñar e observar paxaros.

Cando sexa grande quere ser bióloga.